الطالبة فرح كاظم عناد / المرحلة الرابعة / قسم الهندسة الالكترونية والاتصالات / كلية الهندسة / جامعة المثنى
#قصة نجاح
اني فرح كاظم عناد طالبة هندسة الكترونية واتصالات مرحلة رابعة
بديت بعملي سنة ٢٠٢٢ كنت طالبة بالمرحلة الثالثة
قررت اعتمد على نفسي وابدي مشروعي الخاص والي من خلاله اگدر اوفر تكاليف دراستي
ولان احب شغل الكليجة وضابطتها اختاريت الكليجة
ببداية شغلي حسيت بضغط كبير وماراح اگدر اكمل هواي بسبب صعوبة دراستي
واجهت الصعوبات بثقة وقوة وگدرت اوازن بين دراستي وشغلي ومااقصر او اتخلى عنهم
احيانا تكون صناعة الكليجة مو مثل مااريد وارجع اعيد الشغل كلة واتعب من جديد واني عندي واجبات دراسية او امتحانات
عانيت بمسألة التوصيل
اكثر اليطلبون الكليجة هم طلبة من الجامعة.
اوقات محاضراتهم تتزامن مع محاضراتي وابقى محتارة
شلون اوصلها الهم بدون ما اغيب او اتاخر عن محاضراتي لان اذا بقت لثاني يوم احتمال يرفضونها
وبما ان دراسة الهندسة صعبة تحتاج وقت وجهد لذلك احاول ان اخلص دراستي بالعطل وايام الجمع حتى اتفرغ لشغل الكليجة
واجهت جميع التحديات حتى اثبت ان المرأة تستطيع ان تعتمد على نفسها وتعيش بالحلال واحتفاظ على عفتها وتربيتها وترفع راس اهلها
كنت افتخر من زملائي وزميلاتي يطلبون مني كليجة ويشجعوني
بعض اساتذتي وعن طريق الصدفة راسلوا الصفحة وطلبوا مني كليجة واتفاجؤا اني طالبتهم وشجعوني واستمروا بالطلب
والحمدلله درجاتي زينة واتمنى اكمل دراستي او اتعين بمجال اختصاصي وابقى بشغلتي لان احبها وهي الي وصلتني
رسالتي الى زميلاتي الطالبات ان يكونن عون لاهلهم وساعدوهم
#الدكتور عودة رحيمة عذيب رئيس قسم الهندسة الالكترونية والاتصالات يقول
فرح كاظم عناد طالبة تتمتع بأخلاق عالية وسلوك جيد ولم تسجل بحقها اي مخالفة انضباطية طيلة فترة دراستها في الكلية بالإضافة إلى علاقتها المتميزة بزميلاتها وزملاؤها في القسم . وعلى الرغم من ظروفها الاقتصادية وطبيعه الدراسة في القسم الا انها جاهدت واجتهد واستطاعت النجاح دراسيا وكذلك النجاح عمليا من خلال المشروع الذي احبته وامنت به.
